Xitoylik kimyogarlar dori vositalarini xona haroratida deyteriylash usulini ishlab chiqdi

Xitoylik kimyogarlar organik molekulalar, jumladan, dori vositalari tarkibidagi vodorodni deyteriy bilan almashtirish usulini ishlab chiqdi. Jarayon xona harorati va oddiy bosimda amalga oshiriladi. Deyteriy manbai sifatida ogʻir suv (D₂O) qoʻllaniladi, reaksiya esa koʻrinadigan yorugʻlik taʼsirida boshlanadi. Deyteriylash darajasi 99 foizgacha yetgan.
Xitoy Fan va texnologiyalar universiteti olimlari palladiy nanozarrachalari va uglerod nitridi asosidagi Pd/C₃N₄ fotokatalizatoridan foydalandi. Reaksiya 410 nm toʻlqin uzunligidagi yorugʻlik, xona harorati va taxminan 1 bar bosimda amalga oshirildi.

Usul 54 ta organik birikmada, jumladan, tabiiy moddalar va farmatsevtik preparatlarda sinovdan oʻtkazildi. Shuningdek, 10 mmol miqyosida 2,17 gramm deyteriylangan dori birikmasini olishga erishildi.
Deyteriy — vodorodning barqaror ogʻir izotopidir. Deyteriylash dori molekulalarida kimyoviy reaksiyalar va metabolizm tezligini oʻzgartirishi mumkin. Shu sababli u dori vositalarini ishlab chiqish va kimyoviy tadqiqotlarda qoʻllaniladi.

Koʻplab mavjud usullar yuqori harorat, bosim yoki murakkab deyteriy manbalarini talab qilsa, yangi texnologiya ogʻir suvdan foydalangan holda yumshoq sharoitlarda amalga oshiriladi.
Jarayon palladiy va uglerod nitridi oʻrtasidagi oʻzaro taʼsirga asoslangan: ogʻir suvdan faol deyteriy zarrachalari hosil boʻlib, ular molekulalardagi benzil bogʻlarida vodorodni deyteriyga almashtiradi.
Usul hozircha laboratoriya bosqichida boʻlsa-da, uning yuqori samaradorligi, xona harorati va oddiy bosimda ishlashi deyteriylangan dori vositalarini sintez qilish uchun istiqbolli ekanini koʻrsatadi.