“Oʻzkimyosanoat” AJ va KOICA yosh olimlarni qoʻllab-quvvatlashda davom etmoqda

Koreya xalqaro hamkorlik agentligi (KOICA)ning Oʻzbekistondagi vakolatxonasi hamda “Oʻzkimyosanoat” AJ hamkorligida amalga oshirilayotgan “Oʻzbekistonda kimyo texnologiyalari markazi (UzCCT) salohiyatini oshirish” loyihasi doirasida yana bir muhim qadam tashlandi.

26-avgust kuni Koreyada doktorantura bosqichini davom ettiruvchi 3 nafar stipendiatlar bilan shartnomalar imzolandi. Endi ular Koreyaning Universitet of Science and Technology (UST) oliygohida doktorantura bosqichida oʻqishni davom ettiradilar. 

Dastur yakunida tadqiqotchilar yangi tashkil etilayotgan UzCCTda faoliyatini davom ettirib, oʻz bilim va koʻnikmalarini mamlakatimiz kimyo sanoatida innovatsiyalar va barqaror oʻsishni rivojlantirishga yoʻnaltiradilar. 

2021–2027-yillarga moʻljallangan “Oʻzbekistonda kimyo texnologiyalari markazi (UzCCT) salohiyatini oshirish” yurtimiz kimyo sanoati raqobatbardoshligini oshirish, zamonaviy ilmiy infratuzilmani yaratish hamda malakali mutaxassislar tayyorlashga qaratilgan. Loyiha boshlanganidan buyon 11 nafar magistratura bosqichi talabasi, 10 nafar PhD talabasi dastur ishtirokchisi sifatida tanlab olindi.

“Oʻzkimyosanoat” AJ Matbuot xizmati