“Eng faol innovator ayol” koʻrik-tanlovining respublika bosqichi boʻlib oʻtmoqda

Xotin-qizlarning har tomonlama yetuk mutaxassis boʻlib kamol topishiga boʻlgan intilishlarini qoʻllab-quvvatlash, iqtidorli xotin-qizlarning ixtirochilik va innovatorlik salohiyatini aniqlash, ular orasida sogʻlom raqobat muhitini shakllantirish hamda innovatsion gʻoya, loyiha va texnologiyalarini ishlab chiqarish maqsadida har yili “Oʻzkimyosanoat“ AJ tarmoq korxonalarida faoliyat yuritayotgan 50 yoshgacha boʻlgan mutaxassis xotin-qizlar oʻrtasida “Eng faol innovator ayol” koʻrik-tanlovi oʻtkaziladi. 

Bu yilgi tanlov RKTUning Toshkent shahridagi filialida boʻlib oʻtmoqda. 

Tanlov ishtirokchilari tomonidan energiya tejamkor, ekologik muammolarga yechim beradigan, ishlab chiqarish jarayonlarini mukammallashtiruvchi, import oʻrnini qoplovchi, korxona xarajatlarini tejovchi va qoʻshimcha ish oʻrinlari hamda daromad keltiruvchi jami 13 ta innovatsion gʻoya ishlanmalari taqdim etildi. 

Tanlovda ishtirokchilarning innovatsion ishlanmalarini adolatli va xolisona baholash maqsadida Oila va xotin-qizlar qoʻmitasi hamda Innovatsion rivojlanish agentligi vakillari ham ishtirok etishmoqda. 

Ishchi guruh tomonidan barcha loyihalar chuqur tahlil qilinib, eng munosiblari taqdirlanadi.

 “Oʻzkimyosanoat” AJ Matbuot xizmati