“Dehqonobod kaliy zavodi” AJ tashkil topganligining 15 yilligi keng nishonlandi

Bugun “Dehqonobod kaliy zavodi” AJda yurtimiz Mustaqilligining 34 yilligi hamda korxona tashkil topganining 15 yilligi munosabati bilan “Vatan uchun, millat uchun, xalq uchun” shiori ostida bir qator tadbirlar oʻtkazildi.

Tadbirlarda Qashqadaryo viloyati hokimi Murotjon Azimov, Dehqonobod tumani hokimi Sherzod Shokirov, “Oʻzkimyosanoat” AJ rahbariyati va korxona ishchi-xodimlari ishtirok etdi. 

Unda mehnat fidoiylarining yuksak hissasi eʼtirof etildi, soʻzga chiqqanlar korxonaning 15 yillik taraqqiyot yoʻli, yutuq va muvaffaqiyatlarini qayd etishdi.

Bayram munosabati bilan tashkil etilgan tadbirlar doirasida 30 nafar kam taʼminlangan oilalar farzandlari uchun xayriya asosida sunnat toʻylari oʻtkazildi. Shuningdek, oʻzining vijdonan va sadoqat bilan xizmat qilgan, fidokorona mehnati bilan ajralib turuvchi xodimlar Qashqadaryo viloyati va Dehqonobod tuman hokimliklari, “Oʻzkimyosanoat” AJ hamda korxona rahbariyati tomonidan faxriy yorliqlar va esdalik sovgʻalari bilan taqdirlandi.

Tadbir davomida koʻp yillar mobaynida samarali faoliyat yuritgan xodimlar tantanali tarzda nafaqaga kuzatildi. Bunday eʼtirof va eʼtibor mehnatkashlar qalbida katta faxr va hurmat tuygʻularini uygʻotdi.

Marosimda mamlakatimizda tanilgan sanʼatkorlar ishtirokida konsert dasturi ham namoyish etildi. Qoʻshiqlar, raqslar va ijodiy chiqishlar bayramga oʻzgacha kayfiyat baxsh etdi.

Tadbir yakunlari boʻyicha korxona jamoasining hamjihatligi, ezgu qadriyatlarga sodiqligi va yurt taraqqiyotiga qoʻshayotgan munosib hissasi alohida taʼkidlandi.

“Oʻzkimyosanoat” AJ Matbuot xizmati