“Ўзкимёсаноат” АЖда “Sasol” компанияси вакиллари билан учрашув бўлиб ўтди

“Ўзкимёсаноат” акциядорлик жамиятида Жанубий Африканинг йирик энергетика ва кимё компанияларидан бири — “Sasol Limited” компаниянинг Яқин Шарқ ва Марказий Осиё бўйича вице-президенти Лоуренс Жакобс билан учрашув бўлиб ўтди.

Учрашувда кимё саноати соҳасидаги ҳамкорликни ривожлантириш, замонавий технологияларни жорий этиш, илғор ишлаб чиқариш тажрибасини ўрганиш ҳамда истиқболли ҳамкорлик йўналишлари юзасидан фикр алмашилди.

Такидлаш лозим, “Sasol Limited” компанияси 1950 йилда ташкил этилган бўлиб, бош офиси Жанубий Африка Республикасининг Сандтон шаҳрида жойлашган. Компания энергия ва кимё маҳсулотларини ишлаб чиқариш ҳамда етказиб беришга ихтисослашган.

Фаолиятида синтетик ёқилғи, газ, кимёвий моддалар ва турли саноат маҳсулотларини ишлаб чиқаришда илғор технологиялардан фойдаланади. Компания маҳсулотлари энергетика, кимё саноати, транспорт, тоғ-кон саноати, қишлоқ хўжалиги ва бошқа тармоқларда кенг қўлланилади.“Sasol”нинг технологик тажрибаси ва ишлаб чиқариш салоҳияти кимё саноатида самарадорликни ошириш, маҳсулотлар турини кенгайтириш ҳамда инновацион ечимларни татбиқ этиш нуқтаи назаридан муҳим аҳамиятга эга.

Учрашув якунида томонлар ўзаро манфаатли ҳамкорликни ривожлантириш, соҳадаги истиқболли йўналишларни ўрганиш ва келгусида амалий ҳамкорлик имкониятларини кўриб чиқишга қизиқиш билдирдилар.