Kanadalik olimlar dengiz suvoʻtlaridan bioparchalanidgan plastik ishlab chiqishdi

Kanadalik olimlar guruhi yangi ekologik toza material — dengiz suvoʻtlariga asoslangan plastikni taqdim etdi. Ushbu ishlanma atrof-muhitni anʼanaviy plastik chiqindilaridan himoya qilish va ayniqsa qishloq xoʻjaligida anʼanaviy polietilenga alternativa boʻlishi maqsadida yaratilgan.

Loyiha tashabbuskori — Britaniya Kolumbiyasidan biolog Ranax Chavoshi boʻlib, u ushbu material ustida pandemiya davrida, quruqlikdagi tadqiqotlar toʻxtab qolgan paytda ish boshlagan. 

Plastikning asosini tez oʻsuvchi, oʻgʻit talab qilmaydigan va uglerod gazini soʻrib olish qobiliyatiga ega boʻlgan qahvarang suvoʻtlar tashkil qiladi. Ular shuningdek, sohil hududlarida suv sifati yaxshilanishiga ham yordam beradi.Yaratilgan material egiluvchan va mustahkam boʻlib, toʻliq parchalanadi va mikroplastik qoldirmaydi. Yaqin kelajakda jamoa bu plastikni odatiy plastik mulchani almashtiruvchi vosita sifatida qishloq xoʻjaligi fermalarida sinovdan oʻtkazishni rejalashtirgan. Ishlab chiquvchilarning taʼkidlashicha, bu usul tuproq ifloslanishini kamaytiradi va hosil salomatligini yaxshilashi mumkin.

Chavoshi va uning hamkori Steysi Goldberg tomonidan asos solingan PhyCo startapi mazkur yoʻnalishdagi tadqiqotlar va fermentlar yordamida bioparchalanishni tezlashtirish texnologiyalarini rivojlantirish bilan shugʻullanmoqda. 

Garchi yangi materialning hozirgi narxi anʼanaviy plastiknikidan balandroq boʻlsa-da, tadqiqotchilar ishlab chiqarish miqyosi oshirilganda uning narxi pasayishiga umid qilmoqda.

“Oʻzkimyosanoat” AJ Matbuot xizmati