Jahon kimyo sanoati xabarlari: Hindiston oʻzini oʻzi taʼminlashga intilayapti

Mamlakat karbamid ishlab chiqarish sohasi uchun yangi investitsiya siyosatini (NIPU-2026) tasdiqladi. Bu soʻnggi 14 yil ichida tarmoq qonunchiligida amalga oshirilgan ilk yirik yangilanish hisoblanadi. Ushbu siyosat orqali Hindiston azotli oʻgʻitlar importiga boʻlgan qaramlikni toʻliq bartaraf etishni maqsad qilgan.

Xususan, mamlakat hukumati 8–9 ta yangi gaz-kimyo zavodini ishga tushirish hisobiga karbamid ishlab chiqarish quvvatlarini qariyb 10 million tonnaga oshirishni rejalashtirmoqda. Bu ichki bozordagi mahsulot taqchilligini bartaraf etish imkonini beradi. Hindiston Kimyo sanoati va oʻgʻitlar vazirligi maʼlumotlariga koʻra, har bir yangi korxona yiliga 1,27 million tonnadan ortiq karbamid ishlab chiqarish quvvatiga ega boʻladi.

EY India konsalting kompaniyasi hisob-kitoblariga koʻra, import qilinadigan har bir 1 million tonna karbamidni mahalliy ishlab chiqarish bilan almashtirish mamlakatga har yili 300 milliondan 500 million AQSH dollarigacha boʻlgan valyuta zaxiralarini tejash imkonini beradi.