Ўзбекистон Республикаси Мустақиллигининг 35 йиллиги муносабати билан "Ўзкимёсаноат" акциядорлик жамиятида "Ягона Ватан, ягона халқ бўлиб, ягона ҳаёт ва келажак яратамиз!" шиори остида тантанали байрам тадбири ташкил этилди.

Унда жамият раҳбарияти ходимларни қутлаб, эзгу тилакларини изҳор этишди.

Давлатимиз раҳбарининг тегишли фармонига мувофиқ, "Ўзбекистон Республикаси Мустақиллигининг 35 йиллиги" эсдалик нишони билан тақдирланган ходимларга нишонлар тантанали топширилди.

Шу билан бирга, кимё саноатини ривожлантиришга ҳисса қўшаётган, ишлаб чиқаришда юқори кўрсаткичларга эришаётган ва фаол ходимларга фахрий ёрлиқлар топширилди.

Тадбирга Ўзбек Миллий академик драма театри санъаткорлари ҳам ташриф буюриб, байрамга ўзгача руҳ бағишлашди.

Материал асосини таркибида бир-бири билан боғланган икки олтингугурт атоми мавжуд бўлган 1,2-дитиолан ҳалқали молекулалар ташкил этади. Ушбу ҳалқалар очилганда поли(триметилендисулфид) ҳосил бўлади. Хусусиятларига кўра, мазкур полимер оддий полиетиленга ўхшайди: юмшоқ, сувда эримайди ва гидрофоб хусусиятга эга.

Материалнинг асосий фарқи уни қиздириш жараёнида намоён бўлади. 90°C ҳароратда полимер алоҳида мономерларга парчаланади, совитилганда эса ўз-ўзидан қайта полимерланиб, дастлабки қаттиқ ҳолатига келади.

Таққослаш учун, оддий кимёвий усулда қайта ишланадиган полимерлар 150–200°C каби юқорироқ ҳароратни талаб қилади, олинган хом ашёни эса қўшимча тозалаш зарур. Бундан ташқари, улардаги мономерлар суюқ ҳолатда бўлади, мазкур материалда эса газ ҳолатида мавжуд бўлади.

Бу хусусият материалдан фойдаланишда бир қатор амалий афзалликларни беради:

• Сув ўтказмайдиган қопламалар: полимер буғини мураккаб шаклдаги буюмлар юзасига ҳам осон суртиш мумкин. Бу суюқ таркибларни қўллашга қараганда қулайроқ;
• Осон олиб ташлаш: қопламани қайта қиздириш орқали тезда олиб ташлаш мумкин — полимер шунчаки юзадан буғланиб кетади;
• Оддий тозалаш: қаттиқ ҳолатдан газ ҳолатига ўтиш жараёнида ифлосланган полимер аралашмалардан ажралади ва тоза ҳолда қайта тикланади.

Ушбу хусусиятлар материални бошқа пластиклардан ажратиб туради. Бироқ у чиқиндилар муаммосини тўлиқ ҳал қилмайди ва анъанавий полимерларни бутунлай алмаштириш учун мўлжалланмаган.

Ҳозирги босқичда унинг энг истиқболли қўлланиш йўналишлари — айланма иқтисодиёт тамойилларига мос материаллар ва олиб ташлаш мумкин бўлган махсус қопламалар яратишдан иборат.
 

"Чирчиқ" технопаркига автомобиллар учун сақлагич блоклари, релелар ва электрон модулларни ишлаб чиқиш, ишлаб чиқариш ҳамда сотишга ихтисослашган Хитойнинг етакчи корхонаси - Zhejiang Zhiwei Electronic Technology Co., Ltd. (ZWELEC  бренди) вакиллари ташриф буюрди.

Ташрифдан кўзланган асосий мақсад - "Чирчиқ" ва "Жиззах" технопаркларининг инвестициявий салоҳиятини ўрганишдан иборат бўлди. Ташриф давомида технопарк раҳбарияти ва мутахассислари Хитой делегацияси учун кенгайтирилган тақдимот ўтказди. Унда ишлаб чиқариш майдонларининг техник хусусиятлари ва инфратузилмавий имкониятлари, шунингдек, технопарк резидентлари учун тақдим этиладиган солиқ ва божхона имтиёзлари ҳақида батафсил маълумот берилди.

Мазкур ташриф хорижий инвесторларнинг "Чирчиқ" ва "Жиззах" технопаркларининг саноат ва инвестициявий салоҳиятига бўлган қизиқиши ортиб бораётганининг навбатдаги далили ҳисобланади.

«Ўзкимёсаноат» АЖ тармоқ корхоналарини 2026–2027 йиллар куз-қиш мавсумига барқарор тайёрлаш мақсадида марказий комиссия тузилиб, ҳар бир корхонада зарур чора-тадбирлар режаси ишлаб чиқилди.

Белгиланган режалар асосида муҳандислик-коммуникация ва ишлаб чиқариш инфратузилмаларида капитал ҳамда жорий таъмирлаш ишлари амалга оширилди. Хусусан, 13,3 км электр тармоғи, 900 метр иссиқлик ва 300 метр сув таъминоти тармоқлари, 100 метр газ тармоғи таъмирланди. Шунингдек, 27 та трансформатор подстанцияси ва 5 та қозон таъмирдан чиқарилди.

Қўшимча равишда, иссиқлик тизимларида 1 266 м² изоляция ишлари, 14 та газ тақсимловчи пункт ревизияси, 9 966,2 м² том қопламаларини таъмирлаш, 680,1 м² дераза ойнаси ўрнатиш ҳамда 4 395,1 погон метр темир йўлларни таъмирлаш ишлари бажарилди.

Кўрилган чоралар корхоналарнинг электр, газ, сув ва иссиқлик таъминотини ишончли ташкил этиш, авариявий ҳолатларнинг олдини олиш ҳамда ишлаб чиқариш жараёнларининг куз-қиш мавсумида барқарор ва узлуксиз ишлашини таъминлашга қаратилган.

Тошкент шаҳрида Корея халқаро ҳамкорлик агентлиги (KOICA) кўмагида Корея кимёвий технологиялар илмий-тадқиқот институти (KRICT) билан ҳамкорликда амалга оширилаётган қўшма илмий-тадқиқот (Joint R&D) лойиҳаларининг якуний семинари – Final Review Workshop бўлиб ўтди.

Тадбирда KRICT раҳбарияти ва илмий ходимлари, кореялик экспертлар, Ўзбекистон томонидан қўшма илмий-тадқиқот лойиҳалари иштирокчилари ҳамда “Ўзкимёсаноат” АЖ вакиллари иштирок этди.

Семинарнинг асосий мақсади қўшма илмий-тадқиқот фаолияти якунларини сарҳисоб қилиш, эришилган натижаларни кўриб чиқиш ҳамда Ўзбекистон Республикаси ва Корея Республикаси ўртасидаги илмий-технологик ҳамкорликни янада ривожлантириш истиқболларини муҳокама қилишдан иборат.

Семинар доирасида иккита қўшма R&D лойиҳаси бўйича амалга оширилган ишлар ва эришилган натижалар тақдим этилди.

Тақдимотлар давомида томонлар олиб борилган илмий тадқиқотлар натижаларини батафсил кўриб чиқиб, ўзаро фикр ва тажриба алмашдилар, шунингдек, ишлаб чиқилган технологияларнинг амалиётга татбиқ этиш имкониятларини муҳокама қилдилар. Тадбир якунида умумий муҳокама ўтказилиб, семинар натижалари сарҳисоб қилинди.

Шу муносабат билан мамлакатимиз бўйлаб ўтказилаётган «Маҳаллада ободлик ва меҳр-саховат ойлиги» дастури доирасида «Ўзкимёсаноат» АЖ марказий аппарати ва тармоқ ташкилотларида умумхалқ хайрия ҳашари ташкил этилди.

Ҳашар давомида ходимлар фаол иштирок этиб, ҳудудларни тозалаш, ободонлаштириш ва кўкаламзорлаштириш ишларини амалга оширдилар. Жамоавий меҳнат жараёнида юртдошларимизни бирлаштирувчи меҳр-оқибат, саховат ва ҳамжиҳатлик каби қадриятлар яна бир бор намоён бўлди.

Зеро, мустақилликнинг 35 йиллиги — озод ва обод Ватанимиз тараққиёти, халқимизнинг бирдамлиги ҳамда юртимизда амалга оширилаётган бунёдкорлик ишларини кенг намоён этиш учун муҳим айёмдир. Ушбу қутлуғ санага муносиб тайёргарлик кўришда ҳар бир эзгу ташаббус, ҳар бир ободлик иши муносиб ҳисса бўлиб хизмат қилади.

Ўзбекистон Республикаси давлат мустақиллигининг 35 йиллиги муносабати билан “Ўзкимёсаноат” АЖ ташаббуси асосида Д.И. Менделеев номидаги Россия кимё-технология университетининг Тошкент шаҳридаги филиалида тармоқ корхоналари ходимлари ўртасида “Ягона Ватан, ягона халқ бўлиб, янги ҳаёт ва келажак яратамиз!” шиори остида “Мустақиллик тўйи” фестивали ҳамда “Мустақиллик кубоги” спорт мусобақалари ташкил этилди.

Тўрт кун давомида ўтказилган тадбирлардан кўзланган асосий мақсад — мамлакатимиз мустақиллигининг тарихий аҳамиятини кенг тарғиб қилиш, тармоқ корхоналари ходимлари ўртасида дўстлик ва ҳамжиҳатлик муҳитини мустаҳкамлаш, уларнинг спорт ва маданий тадбирлардаги фаол иштирокини рағбатлантиришдан иборат бўлди.

“Мустақиллик тўйи” фестивали доирасида тармоқ корхоналарида кўп йиллар самарали меҳнат қилган меҳнат фахрийлари иштирокида “Уч авлод учрашуви” ҳамда “Раҳбар ва ёшлар” учрашувлари ўтказилди. Мулоқотлар давомида корхоналарда шаклланган меҳнат анъаналари, соҳадаги бугунги ўзгаришлар ва ёш мутахассислар учун яратилаётган имкониятлар ҳақида фикр алмашилди.

Фестивал билан бир қаторда “Мустақиллик кубоги” доирасида волейбол, стол тенниси, мини-футбол, баскетбол ва гандбол спорт турлари бўйича қизғин баҳслар ташкил этилди. Унда тармоқ корхоналаридан жамланган жамоалар иштирок этиб, ўзларининг жисмоний тайёргарлиги, чаққонлиги ва жамоавий ҳаракатларини намоён этдилар.

Спорт мусобақалари иштирокчилар учун нафақат ўз маҳоратларини синовдан ўтказиш, балки турли корхоналар вакиллари билан яқиндан танишиш, ўзаро тажриба алмашиш ва дўстона муносабатларни мустаҳкамлаш учун ҳам муҳим майдон бўлди.

Тадбирларнинг якуний қисмида мусобақаларда фаол иштирок этган ходимлар ҳамда ғолиб ва совриндор жамоалар эсдалик совғалари ва муносиб тақдирловлар билан рағбатлантирилди.

«Ўзкимёсаноат» АЖ тизимидаги корхоналар ходимлари ўртасида спортга бўлган қизиқиш ва соғлом рақобат муҳитини янада оширишга қаратилган беллашувлар янги босқичда давом этмоқда. Ўзбекистон Республикаси давлат мустақиллигининг 35 йиллигига бағишланган «Мустақиллик кубоги» доирасида гандбол бўйича навбатдаги мусобақалар ўтказилди.

Тўп учун кечган ҳар бир учрашув иштирокчилардан юқори жисмоний тайёргарлик, тезкорлик ва аниқ ҳаракатларни талаб қилди. Жамоалар ҳужум ва ҳимоядаги тактик ёндашувлари, майдондаги ўзаро ҳамкорлиги ҳамда ғалабага бўлган интилишлари билан ажралиб турди.

Беллашувлар якунида «Қизилқум фосфорит комплекси» жамоаси энг юқори натижани қайд этиб, мусобақанинг биринчи ўрнига эга чиқди. «Индорама-Фарғонаазот» АЖ жамоаси иккинчи, «Деҳқонобод калий заводи» АЖ жамоаси эса учинчи ўринни қўлга киритди.

Мусобақа натижалари тармоқ корхоналари ўртасида спорт анъаналарини ривожлантириш, ходимларни фаол ҳаёт тарзига кенг жалб этиш ва жамоалар ўртасидаги ҳамкорликни мустаҳкамлашда «Мустақиллик кубоги»нинг аҳамиятини яна бир бор намоён этди.

Учрашув “Корея–Ўзбекистон илмий-тадқиқот ва лойиҳа институти — Кимё технологиялари инновация марказини ташкил этиш” (UzCCT) лойиҳасини амалга оширишнинг жорий ҳолати ҳамда томонлар ўртасидаги ҳамкорликнинг кейинги йўналишларини муҳокама қилишга бағишланди.

Музокаралар давомида лойиҳа доирасида амалга оширилаётган ишлар, эришилган натижалар ҳамда томонларнинг биргаликдаги мувофиқлаштирилган ёндашувини талаб этувчи долзарб масалалар кўриб чиқилди.

Учрашувда қўшма илмий-тадқиқот лойиҳалари (Joint R&D) якунларига алоҳида эътибор қаратилди. Томонлар олиб борилган илмий-тадқиқот ишларининг асосий натижалари, эришилган илмий ютуқлар ва нашрлар ҳолати, шунингдек, якунланмаган ишларни давом эттириш бўйича режаларни муҳокама қилдилар. Олинган натижаларни УзCCТнинг келгусидаги илмий-тадқиқот фаолиятида амалий қўллаш имкониятлари ҳам кўриб чиқилди.

Шунингдек, “Ўзкимёсаноат” АЖ, KOICA  ва KRICT ўртасидаги кейинги ишларни самарали ташкил этиш бўйича амалий қадамлар, томонларнинг вазифалари ва мувофиқлаштириш механизмлари белгилаб олинди.

Ўзбекистон Республикаси давлат мустақиллигининг 35 йиллиги муносабати билан “Ўзкимёсаноат” АЖ тизимидаги корхоналар ходимлари ўртасида ташкил этилаётган “Мустақиллик кубоги” спорт мусобақалари қизғин давом этмоқда.

Навбатдаги баҳслар баскетбол спорт тури бўйича ўтказилиб, жамоалар майдонда ўзларининг маҳорат, чаққонлик ва жамоавий ҳамжиҳатлигини намоён этди.

Муросасиз ва қизғин кечган учрашувлар якунига кўра:

• 1-ўрин — “Қўнғирот сода заводи” жамоаси.
• 2-ўрин — “Навоийазот”  АЖ жамоаси;
• 3-ўрин —“Индорама-Фарғонаазот” АЖ

Мусобақалар нафақат спортдаги энг кучли жамоаларни аниқлаш, балки тармоқ корхоналари ходимлари ўртасида дўстона муҳит, жамоавий руҳ ва соғлом рақобатни мустаҳкамлашга хизмат қилмоқда.

Ўзбекистон Республикаси давлат мустақиллигининг 35 йиллиги муносабати билан «Ўзкимёсаноат» АЖ тизимида ўтказилаётган «Мустақиллик тўйи» фестивали доирасида «Уч авлод учрашуви» ташкил этилди.

Мулоқотда «Ammofos-Maxam» AJнинг меҳнат фахрийлари — Сув таъминоти ва оқова цех бошлиғи Шухратилла Хаджаев, Модернизация, маҳаллийлаштириш, инвестиция, инновация ва корпоратив алоқа бошқармаси бошлиғи Икром Мамасолиев ҳамда Лойиҳа-конструкторлик бўлими бошлиғи Эркин Хўжамбердиев иштирок этдилар.

Учрашувда мустақиллик йилларида кимё саноатида амалга оширилган ўзгаришлар, корхоналарда шаклланган меҳнат анъаналари ва бугунги тараққиёт босқичи ҳақида фикр алмашилди. Меҳнат фахрийлари ўзларининг кўп йиллик касбий тажрибалари, соҳа ривожидаги муҳим даврлар ва меҳнат фаолияти давомидаги хотиралари билан ўртоқлашдилар.

Суҳбат давомида мустақиллик йилларида яратилган имкониятлар, замонавий технологиялар ва янги авлод мутахассисларининг соҳа тараққиётидаги ўрни алоҳида таъкидланди. Ёшларга касбий тажрибани етказиш, меҳнатга садоқат ва масъулият билан ёндашиш муҳимлиги қайд этилди.

«Уч авлод учрашуви» каби тадбирлар мустақиллик йилларида эришилган натижаларни авлодлар нигоҳида яна бир бор сарҳисоб қилиш, бой меҳнат тажрибасини ёшларга етказиш ва келгуси тараққиёт мақсадлари атрофида бирлашишга хизмат қилади.

Мустақилликнинг 35 йиллиги муносабати билан "Ўзкимёсаноат" АЖ тизимидаги корхоналар ходимлари ўртасида спортнинг турли йўналишлари бўйича ўтказилаётган "Мустақиллик кубоги" мусобақалари доирасида мини-футбол баҳслари ҳам юқори шижоат ва кўтаринки кайфиятда бўлиб ўтди.

Бир неча жамоа иштирокида кечган беллашувларда иштирокчилар ғолиблик учун бор куч ва маҳоратини ишга солди. Қизғин ва муросасиз кечган баҳслар якунига кўра, совриндорлар қуйидагича аниқланди:

1-ўрин — "Максам-Чирчиқ" АЖ жамоаси;
2-ўрин — "Қизилқум фосфорит комплекси" жамоаси;
3-ўрин — "Қўнғирот сода заводи" жамоаси.

Спорт мусобақаларининг ташкил этилиши тармоқ корхоналари ходимлари ўртасида соғлом турмуш тарзини тарғиб қилиш, жамоавий ҳамжиҳатликни мустаҳкамлаш ҳамда фаол ва соғлом иш муҳитини шакллантиришга хизмат қилмоқда.

"Мустақиллик кубоги" доирасидаги мусобақаларнинг кейинги баҳслари ҳам қизғин давом этмоқда.